នៅព្រឹកថ្ងៃទី២៦ ខែមិថុនា ឆ្នាំ២០១៦ លោកជំទាវជូ ប៊ុនអេងរដ្ឋលេខាធិការក្រសួងមហាផ្ទៃ ជាសមាជិកគណៈកម្មាធិការ
កណ្តាលគណៈបក្សប្រជាជនកម្ពុជា និងជាប្រធានក្រុមការងារចុះជួយក្រុងកំពង់ឆ្នាំងបានអញ្ជើញជាអធិបតី ក្នុងមិទ្ទិញប្រារព្ធខួបកំណើតលើកទី៦៥ ថ្ងៃបង្កើតគណបក្សប្រជាជនកម្ពុជា និងពីធីប្រកាសបញ្ចូលសមាជិកបក្ស ចំនួន៦៩៥នាក់ នៅក្នុងស្នាក់ការគណបក្សប្រជាជនកម្ពុជាខេត្តកំពង់ឆ្នាំង។
លោកជំទាវ ជូ ប៊ុនអេង ថ្លែងថា៖គណបក្សប្រជាជនកម្ពុជាមានអាយុ៦៥ឆ្នាំហើយ គឺជាគណបក្សដែលមានវ័យចំណាស់ជាងគេ មានបទពិសោធន៍ជាងគេក្នុងការដឹកនាំប្រទេស ដែលមិនទាន់មានការធ្វើឲ្យប្រទេសជាតិធ្លាក់ក្នុងគ្រោះមហន្តរាយនោះឡើយ។ មិនតែប៉ុណ្ណោះ បានរំដោះប្រទេសជាតិចេញពីរបបប្រល័យពូជសាសន៍ប៉ុល ពត ធ្វើប្រទេសជាតិមានសុខសន្តិភាពហើយបានចាប់ផ្តើមកសាងប្រទេសតាំងពីបាទដៃទទេរហូតមានការរីកចំរើនលើគ្រប់វិស័យដល់បច្ចុប្បន្ននេះ។
លោកជំទាវបានបន្តថា៖ ក្នុងពេលនេះយើងទាំងអស់គ្នាគឺជាសាក្សីរស់មិនអាចក្រឡៃបាន ដែលបានឆ្លងកាត់សមុទ្រទុក្ខទន្លេឆ្អឹង ស្ទឹងឈាម និងការនិរាសព្រាត់ប្រាស់ក្រុមគ្រួសារ នៅក្នុងរបបព្រៃផ្សៃ ៣ឆ្នាំ ៨ខែ និង២០ថ្ងៃហើយមានតែគណបក្សប្រជាជនកម្ពុជាតែមួយគត់ ដែលសង្គ្រោះជីវិតប្រជាពលរដ្ឋកម្ពុជាអោយរួចផុត ពីគ្រោះមរណៈ ដោយបានតស៊ូឡើងវាយរំលំ របបខ្មែរក្រហម រហូតទទួលជ័យជំនះ៧ មករា ឆ្នាំ១៩៧៩ ក្រោមការដឹកនាំរបស់សម្តេច ហ៊ុន សែន ប្រមុខ រាជរដ្ឋាភិបាល កម្ពុជា និងជាប្រធានគណបក្សប្រជាជនកម្ពុជា បានអនុវត្តគោលនយោបាយឈ្នះ ឈ្នះ រំលាយ អង្គការចាត់តាំង របស់ខ្មែរក្រហម ដោយបង្រួបបង្រួមជាតិតែមួយឡើងវិញ ទើបប្រទេសជាតិ បានសុខសន្តិភាព ពេញបរិបូណ៌ និងមានការកសាង និងអភិវឌ្ឍលើគ្រប់វិស័យដូចបានឃើញស្រាប់សព្វថ្ងៃនេះ។
លោកជំទាវ ក៏បានផ្តាំផ្ញើ ដល់សមាជិកបក្សថ្មីទាំងអស់ សូមគោរពអោយបាននូវល័ក្ខន្ដិកៈនិងគោលនយោបាយដឹកនាំរបស់គណបក្សប្រជាជនកម្ពុជា និងគោលនយោបាយដឹកនាំរបស់ប្រមុខរាជរដ្ឋាភិបាលដែលមានទិសដៅតែមួយដូចគ្នា គឺធ្វើអ្វីៗទាំងអស់ដើម្បីប្រជាជន ដើម្បីសុខសន្តិភាព ស្ថេរភាពនិងសេចក្តីសុខរបស់ប្រជាជន។
នៅក្នុងឱកាសនោះដែរ ឯកឧត្តម ឈួរ ចន្ទ័ឌឿន ប្រធានគណបក្សប្រជាជនកម្ពុជាខេត្តកំពង់ឆ្នាំង ក៏បានឡើងអាន សុន្ទរកថាទាំងស្រុងរបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ថ្លែងក្នុងពិធីមីទ្ទិញរំលឹកខួបអនុស្សាវរីយ៍លើកទី៦៥ ថ្ងៃបង្កើតគណបក្សប្រជាជនកម្ពុជា ថ្ងៃទី២៨.០៦.១៩៥១២០.០៦.២០១៦ និងទិសដៅរបស់គណបក្ស ដោយនៅក្នុងពិធីនេះ សមាជិក សមាជិកាចូលរួមក្នុងពិធីនេះចំនួន១៥៤៩នាក់បានគាំទ្រគ្រប់ៗគ្នា។
