យុវជន យុវតីចំនួន៣២៥នាក់ត្រូវបានប្រកាសចូលជាសមាជិកនៃគណបក្សប្រជាជនកម្ពុជា ស្រុកកំពង់ត្រឡាចខេត្តកំពង់ឆ្នាំង ដែលពិធីនេះបានប្រព្រឹត្តទៅក្រោមអធិបតីភាពឯកឧត្តម កឹម សៀ ក្រុមការងារថ្នាក់កណ្ដាល និងជាប្រធានការងារចុះស្រុកកំពង់ត្រឡាច កាលពីថ្ងៃទី៣០ ខែកក្កដា ឆ្នាំ២០១៦។ ក្នុងនោះក៏មានការចូលរួមពីលោក លោកស្រីសមាជិក សមាជិកាបក្សប្រជាជនខេត្ត ស្រុកជាច្រើននាក់ផងដែរ។
ឯកឧត្តមកឹម សៀបានថ្លែងថា៖ក្មួយៗទាំងអស់ពិតជាបានយល់ច្បាស់ពីគោលនយោបាយការរបស់គណបក្សប្រជាជនកម្ពុជា គឺធ្វើអ្វីៗទាំងអស់ដើម្បីប្រទេសជាតិ និងដើម្បីប្រជាជន ដែលកន្លងមកគ្រប់អាណត្តិគណបក្សប្រជាជនកម្ពុជាត្រូវបានប្រជាជនបានបោះឆ្នោតគាំទ្រជានិច្ច ហើយក្រោមការដឹកនាំរបស់រាជរដ្ឋាភិបាល ដែលមានថ្នាក់ដឹកនាំជាច្រើនជាមន្ត្រីរបស់គណបក្សប្រជាជន បានធ្វើអោយប្រទេសជាតិមានការអភិវឌ្ឍន៍រីកចំរើនលើគ្រប់វិស័យ។ ក្មួយៗទាំងអស់ជាសិស្សសុទ្ធតែមានសម្ថភាពពិតៗ ជាទំពាំងស្នងឫស្សី និងជាសសរទ្រូងដ៏រឹងមាំរបស់ប្រទេសជាតិ យុវជនជាស្នូលដ៏សំខាន់នៅក្នុងមូលដ្ឋាន ដើម្បីអោយមូលដ្ឋាន រឹងមាំរីកចម្រើន និងមានសុវត្ថិភាពល្អទៅបានទាល់តែមានក្មួយៗចូលរួមផងដែរ។
ឯកឧត្តមបានមានប្រសាសន៍បន្តទៀតថា៖គណបក្សប្រជាជនគឺជាគណបក្សតែមួយគត់ដែលបានរំដោះប្រទេសជាតិ ប្រជាជនអោយរួចផុតពីរបបប្រល័យពូជសាសន៍ ប៉ុល ពត។ គណបក្សប្រជាជនបានយកវប្បធម៌សន្ទនាចចារស្វែងរកសន្តិភាពជាមួយសម្តេច ព្រះបរមរតនកោដ្ឋ នរោត្តម ព្រះសីហនុ អតីតព្រះមហាក្សត្រនៃព្រះរាជាណាចក្រកម្ពុជា និងជាអ្នកយាង សម្តេចចូលប្រទេស គ្រងរាជសម្បត្តិឡើងវិញ ដើម្បីបង្រួបបង្រួមជាតិខ្មែរតែមួយឡើងវិញ។ ទន្ទឹមនឹងនេះ ប្រទេសកម្ពុជាបានប្រកាន់របបលទ្ធិប្រជាធិបតេយ្យសេរី ពហុបក្ស មានសុខសន្តិភាព ពលរដ្ឋមានសិទ្ធិសេរីភាពគ្រប់គ្រាន់ដែលមានចែងក្នុងរដ្ឋធម្មនុញ ក្នុងនោះដែរ ក៏មានគណបក្សជាច្រើនចូលរួមបោះឆ្នោតកសាងប្រទេស សមិទ្ធផលដ៏មហាធំធេងនេះ គឺដោយសារគណបក្សប្រជាជនកម្ពុជា។
ឯកឧត្តម ក៏បានផ្តាំផ្ញើផងដែរដល់សមាជិក សមាជិកាបក្សទាំងអស់ ត្រូវរឹតចំណងសាមគ្គីផ្ទៃក្នុងបក្សអោយបានរឹងមាំ ត្រូវចូលរួមផ្សព្វផ្សាយគោលនយោបាយរបស់គណបក្សប្រជាជនកម្ពុជាអោយបានទូលំទូលាយដល់ប្រជាពលរដ្ឋនៅក្នុងមូលដ្ឋាន ដើម្បីអោយពួកគាត់បានយល់ច្បាស់ និងចូលរួមគាំទ្របោះឆ្នោតគាំទ្រគណបក្សប្រជាជនកម្ពុជា ក្នុងពេលបោះឆ្នោតឆ្នាំ២០១៧ និង២០១៨ខាងមុខនេះ។
