ឯកឧត្តមឈួរ ច័ន្ទឌឿន អភិបាលខេត្តកំពង់ឆ្នាំង បានជំរុញឲ្យមន្ទីរ អង្គភាពជុំវិញខេត្ត និងអាជ្ញាធរដែនដីត្រូវបម្រើសេវា និងដោះស្រាយបញ្ហាប្រឈមស្របតាមច្បាប់ជូនប្រជាពលរដ្ឋឲ្យបានទាន់ពេលវេលាចៀសវាងបង្កបញ្ហាជាមួយប្រជាពលរដ្ឋ។ ត្រូវដោះស្រាយទំនាស់ ធ្វើជាមន្រ្តីមិនត្រូវបង្កើនទំនាស់ជាមួយប្រជាពលរដ្ឋនោះទេ ព្រោះថាប្រជាពលរដ្ឋគឺជាម្ចាស់របស់យើងទាំងអស់គ្នា។ ឯកឧត្តមបានជំរុញបែបនេះនៅពេលដែលឯកឧត្តមបានអញ្ជើញជាអធិបតីភាពក្នុងពិធីបិទផ្សាយជាសាធារណៈនូវឯកសារនៃការវិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធក្នុងភូមិអញ្ជាញរូង និងភូមិដំរីកូន ក្នុងឃុំអញ្ជាញរូង ស្រុកបរិបូណ៌ ខេត្តកំពង់ឆ្នាំង នៅព្រឹកថៃ្ងទី៩ខែកុម្ភះឆ្នាំ២០១៦។
ជាមួយគ្នានោះ ឯកឧត្តមអភិបាលបានជំរុញដល់ថ្នាក់ដឹកនាំ និងមន្រ្តីជំនាញសុរិយោដី និងអាជ្ញាធរគ្រប់លំដាប់ថ្នាក់ធ្វើយ៉ាងណាកុំឲ្យប៉ះពាល់ និងបាត់កម្មសិទ្ធិដីធ្លីរបស់ប្រជាពលរដ្ឋហើយរាល់ខ្លឹមសារនៃការផ្សព្វផ្សាយមន្ទីរជំនាញសុរិយោដីត្រូវធ្វើយ៉ាងណាឲ្យប្រជាពលរដ្ឋឆាប់យល់កុំឲ្យយល់តែម្នាក់ឯង កត្តាសំខាន់ធ្វើឲ្យប្រជាពលរដ្ឋទទួលយកបានដោយអស់ចិត្ត។
ក្នុងនោះដែរ ឯកឧត្តម ក៏បានលើកឡើងពីគោលនយោបាយរាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តី ហើយឯកឧត្តម ក៏បានរំលឹកពីអនុសាសន៍របស់សម្តេចដែលកន្លងមក សម្តេចតែងគិតគូពីសុខទុក្ខប្រជាពលរដ្ឋគ្រប់ទីកន្លែង និងដោះស្រាយរាល់សំណូមពររបស់ប្រជាពលរដ្ឋបានទាន់ពេលវេលាដូចជាមិនយកពន្ធដីស្រែពីប្រជាពលរដ្ឋ លប់បំបាត់ឡូតិ៍នេសាទ មិនឲ្យយកលុយតាមផ្លូវមួយចំនួនពីប្រជាពលរដ្ឋ ម៉ូតូដែលមានកម្លាំងក្រោម១២៥ CC មិនអនុញ្ញាតិឲ្យធ្វើប័ណ្ណបើកបរ ដោយគ្រាន់តែសំណូមពរឲ្យប្រជាពលរដ្ឋរៀនច្បាប់ចរាចរណ៍ និងចូលរួមគោរពច្បាប់ចរាចរណ៍ទាំងអស់គ្នា មិនឲ្យយកពន្ធប្រថាប់ត្រាពីការផ្ទេរមរតក ក្នុងក្រុមគ្រួសារ ជាពិសេសក្រោមការដឹកនាំប្រកបដោយគតិបណ្ឌិតរបស់សម្តេចតេជោហ៊ុន សែន បានធានាសុខសន្តិភាពទាំងក្នុងប្រទេស និងនៅតាមព្រំដែនជាមួយប្រទេសជិតខាងផងដែរ។
លោកកែវ សឿងសោភ័ណ្ឌ ប្រធានមន្ទីរសុរិយោដីខេត្ត បានឲ្យដឹងថា៖ការកំណត់ព្រំប្រទល់និងការវិនិច្ឆ័យភូមិអញ្ចាញរូងសរុបចំនួន១.៩១៥ក្បាលដី និងការប្រមូលទិន្នន័យសរុបចំនួន១.៩១៥ក្បាលដី។ ភូមិដំរីកូនការកំណត់ព្រំប្រទល់ និងការវិនិច្ឆ័យបានចំនួន១.៥៩៧ក្បាលដី និងការប្រមូលទិន្នន័យសរុបចំនួន១.៥៩៧ក្បាលដី។ លោកបានបន្តទៀតថាកិច្ចប្រជុំនៃការបិទផ្សាយនេះគឺជាតំណាក់កាលទី៣នៃនីតិវិធីបញ្ចប់ការងារនៅវាលចំពោះរាល់ឯកសារ និងទិន្នន័យក្បាលដីទាំងអស់ និងបញ្ជីឈ្មោះរបស់ម្ចាស់ដីសម្រាប់ក្បាលដីក្នុងតំបន់វិនិច្ឆ័យដើម្បីធ្វើការបញ្ជាក់ភាពត្រឹមត្រូវ និងខុសឆ្គងដែលត្រូវកែតម្រូវក្នុងរយៈពេល៣០ថៃ្ង និងមន្រ្តីជំនាញ និងរង់ចាំពន្យល់បកស្រាយនូវចម្ងល់ផ្សេងៗលើឯកសារដែលបានបិទផ្សាយនេះក្នុងករណីមានបណ្តឹងតវ៉ាមន្រ្តីជំនាញ និងរង់ចាំទទួលព័ត៌មានដើម្បីធ្វើការស្រាវជ្រាវដោះស្រាយតាមច្បាប់ដើម្បីឲ្យប្រជាពលរដ្ឋទាំងអស់ទទួលយកបានដោយអស់ចិត្ត។ លោកក៏បានអំពាវនាវដល់គ្រប់ស្ថាប័នរដ្ឋ និងឯកជនព្រមទាំងប្រជាពលរដ្ឋទាំងអស់ និងចូលរួមធ្វើការពិនិត្យនិងមានសិទ្ធិជំទាស់តវ៉ាពីព័ត៌មានក្បាលដីទាំងឡាយណាដែលមិនត្រឹមត្រូវប្រកបដោយតម្លាភាពនិងប្រសិទ្ធភាពទទួលខុសត្រូវខ្ពស់តាមផ្លូវច្បាប់៕
