អាជ្ញាធរ​ខេត្ត​កំពង់ឆ្នាំង ជួប​ពិភាក្សា​ការងារ​ជាមួយ​ក្រុមហ៊ុន​សេរ៉ាមិច ប្រទេស​ចិន


ព្រឹក​ថ្ងៃ​ទី​១៤ ខែ​កក្កដា ឆ្នាំ​២០១៥ នៅ​សាលា​ខេត្ត​កំពង់ឆ្នាំង ឯកឧត្ដម ហ៊ី ណាត អភិបាល​រង​ខេត្ត បាន​ទទួល​ស្វាគមន៍ និង​ជួប​ពិភាក្សា​ការងារ​ជាមួយ​គណៈ​ប្រតិភូ​ក្រុមហ៊ុន​សេរ៉ាមិច​ជីងទ័រចិន នៃ​ទីក្រុង​ជីងទ័រចិន ខេត្ត​ហ្សាំងស៊ី សាធារណរដ្ឋ​ប្រជាមានិត​ចិន ដឹក​នាំ​ដោយ ​លោក វ៉ាង យ៉ៅ ប្រធាន​ក្រុម​ប្រឹក្សាភិបាល​ក្រុមហ៊ុន​សេរ៉ាមិច​ជីងទ័រចិន។

ដំណើរ​ទស្សនកិច្ច​នេះ គឺ​ជា​ផ្នែក​មួយ​នៃ​ការ​អនុវត្ត​អនុស្សារណៈ​យោគយល់​គ្នា​ស្ដី​ពី​កិច្ច​សហប្រតិបត្តិការ​រវាង​ខេត្ត​កំពង់ឆ្នាំង និង​ទីក្រុង​ជីងទ័រចិន ដែល​បាន​ចុះ​ហត្ថលេខា​កាល​ពី​ខែ​ធ្នូ ឆ្នាំ​២០១៤។ ក្រុមហ៊ុន​ជីងទ័រចិន ចង់​ផ្ដល់​ជំនួយ​បច្ចេកទេស​ដល់​ខេត្ត​កំពង់ឆ្នាំង ក្នុង​ការ​អភិវឌ្ឍ​វិស័យ​កុលាលភាជន៍​ឲ្យ​កាន់​តែ​មាន​គុណភាព និង​ប្រណិតភាព។ ក្រុមហ៊ុន​ក៏​កំពុង​សិក្សា​អំពី​លទ្ធភាព​វិនិយោគ​ទ្រង់​ទ្រាយ​ធំ លើ​វិស័យ​សេរ៉ាមិច​នៅ​ខេត្ត​កំពង់ឆ្នាំង​ផង​ដែរ។ ជា​ការ​ឆ្លើយ​តប ឯកឧត្ដម ហ៊ី ណាត បាន​ស្វាគមន៍​ចំពោះ​ក្រុមហ៊ុន​ដែល​មាន​បំណង​ជួយ​អភិវឌ្ឍ​វិស័យ​កុលាលភាជន៍ និង​ចង់​បណ្ដាក់​ទុន​វិនិយោគ​លើ​វិស័យ​សេរ៉ាមិច ដើម្បី​លើក​ស្ទួយ​កម្រិត​ជីវភាព​ប្រជាជន​ក្នុង​ខេត្ត​កំពង់ឆ្នាំង ស្រប​តាម​គោល​នយោបាយ​របស់​រាជ​រដ្ឋាភិបាល។

នៅ​ចុង​បញ្ចប់​នៃ​ជំនួប​ពិភាក្សា គណៈ​ប្រតិភូ​បាន​ចុះ​ពិនិត្យ​ទីតាំង​សិប្បកម្ម​កុលាលភាជន៍ នៅ​ក្នុង​ឃុំ​ស្រែ​ថ្មី ស្រុក​រលាប្អៀរ ។

1

3

2

5

4

6