សម្ដេចចៅហ្វាវាំង គង់ សំអុល អញ្ជើញប្រកាសបញ្ចូលសមាជិកគណបក្សជាយុវជនចំនួន ៤៦៣ នាក់


កំពង់ឆ្នាំង ៖​ យុវជន​យុវនារី​មក​ពី​១១​ឃុំ​ក្នុង​ស្រុក​បរិបូណ៌ ខេត្ត​កំពង់ឆ្នាំង​ចំនួន​៤៦៣​រូប ស្រី​២១០​រូប បាន​ស្ម័គ្រ​ចិត្ត​ចូល​ជា​សមាជិក​គណបក្ស​ប្រជាជន​កម្ពុជា។ ពិធី​ប្រកាស​បញ្ចូល​សមាជិក សមាជិកា​ថ្មី​នេះ​បាន​ធ្វើ​ឡើង នៅ​ព្រឹក​ថ្ងៃទី​១៩ ខែកញ្ញា ឆ្នាំ​២០១៥ នៅ​ទីស្នាក់ការ​គណបក្ស​ប្រជាជន​កម្ពុជា​ស្រុកបរិបូណ៌ ក្រោម​អធិបតីភាព​ដ៏​ខ្ពង់ខ្ពស់​របស់ សម្តេច​ចៅហ្វា​វាំង គង់ សំអុល សមាជិក​គណៈ​អចិន្ត្រៃយ៍​គណៈ​កម្មាធិការ​កណ្តាល​គណបក្ស​ប្រជាជន​កម្ពុជា និង​ជាប្រធាន​ក្រុម​ការងារ​ចុះ​ជួយ​ខេត្ត​កំពង់ឆ្នាំង ដោយ​មាន​ការ​ចូលរួម​ពី​ ឯកឧត្តម គុយ សុផល ឯកឧត្ដម ឈា ហន ឯកឧត្ដម លោកជំទាវ សមាជិក​សមាជិកា​ក្រុមការងារ​ថ្នាក់​កណ្តាល ឯកឧត្ដម ឈួរ ច័ន្ទឌឿន ប្រធានគណៈកម្មាធិការគណបក្សខេត្តកំពង់ឆ្នាំង លោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំងមកពីគណបក្សប្រជាជនកម្ពុជា ឯកឧត្ដម លោកជំទាវ លោក លោកស្រី ក្រុមការងារថ្នាក់ខេត្ត ​ស្រុក ឃុំ និង​សមាជិក​សមាជិកា​ថ្មី​សរុប​ចំនួន​៦៤៩នាក់។

បន្ទាប់​ពី​តំណាង​សមាជិក​គណបក្ស​ថ្មី​ទាំង​៤៦៣​រូប បាន​ឡើង​អាន​ពាក្យ​សុំ​ចូល​ជា​សមាជិក​គណបក្ស​ប្រជាជន​កម្ពុជា​ រួច​មក លោក សូរ សារ៉េត ប្រធាន​គណៈ​កម្មាធិការ​គណបក្ស​ប្រជាជន​កម្ពុជា​ស្រុក​បរិបូណ៌ បាន​អាន​សេចក្តី​សំរេច​លេខ ៣៩៩/០១៥ ចុះ​ថៃ្ង​ទី​១១​ខែ​សីហា​ឆ្នាំ​២០១៥  របស់​គណៈ​កម្មាធិការ​គណបក្ស​ប្រជាជន​កម្ពុជា​ស្រុកបរិបូណ៌ សំរេច​បញ្ចូល​សមាជិក​សមាជិកា​ថ្មី​យុវជន​យុវនារី​ចំនួន​៤៦៣រូប ស្រី​២១០​រូប។

បន្ទាប់​មក​តំណាង​សមាជិក​ថ្មី​បាន​ឡើង​ធ្វើ​ការ​ប្តេជ្ញា​ចិត្ត​ដូច​ត​ទៅ៖ ១.ខិតខំ​អភិវឌ្ឍន៍​អប់រំ​សមត្ថភាព​ខ្លួន​អោយ​ក្លាយ​ទៅ​ជា​កំលាំង​ពិត​របស់​គណបក្ស​ប្រជាជន​កម្ពុជា និង​ប្រទេស​ជាតិ, ២.សាមគ្គីភាព​ផ្ទៃ​ក្នុង​បក្ស​អោយ​បាន​ល្អនិង​ទំនាក​ទំនង​ល្អ​ជាមួយ​មជ្ឈដ្ឋាន​នានា​ក្នុង​សង្គម​ដើម្បី​ពង្រឹង​កិត្យានុភាព​របស់​គណបក្ស, ៣.គាំទ្រ​បេក្ខភាព​សម្តេច​តេជោ​ហ៊ុនសែន​ជា​នាយក​រដ្ឋមន្រ្តី​គ្រប់​អាណត្តិ​ដើម្បី​ដឹកនាំ​នាវា​កម្ពុជា​អោយ​មាន​សុខ​សន្តិភាព​និង​ការ​អភិវឌ្ឍនូវ​សមិទ្ធផល​ថ្មីៗ​បន្ថែម​ទៀត។

មាន​ប្រសាសន៍​សំណេះ​សំណាល​ក្នុង​ឱកាស​នោះ សម្តេច​ចៅហ្វា​វាំង គង់ សំអុល បានថែ្លងថា៖ក្មួយ​ៗ​ទាំង​អស់​ពិត​ជា​បាន​យល់​ច្បាស់​ពី​គោល​នយោបាយ​ការ​ដឹកនាំ​របស់​គណបក្ស​ប្រជាជន​កម្ពុជា គឺ​ធ្វើ​អ្វី​ៗ​ទាំងអស់​ដើម្បី​ប្រទេស​ជាតិ និង​ដើម្បី​ប្រជាជន  ដែល​កន្លង​មក​គ្រប់​អាណត្តិ គណបក្ស​ប្រជាជន​កម្ពុជា​ត្រូវ​បាន​ប្រជាជន បោះឆ្នោត​គាំទ្រ​ជានិច្ច  ហើយ​ក្រោម​ការ​ដឹកនាំ​របស់​រាជ​រដ្ឋាភិបាល បាន​ធ្វើ​អោយ​ប្រទេស​ជាតិ​មាន​ការ​អភិវឌ្ឍ​រីក​ចំរើន​លើ​គ្រប់​វិស័យ។ ក្មួយ​ៗ​ទាំង​អស់ សុទ្ធ​តែ​មាន​សមត្ថភាព​ពិតៗ  ជា​ទំពាំង​ស្នង​ឫស្សី និង​ជា​សសរ​ទ្រូង ដ៏​រឹងមាំ​របស់ប្រទេ សជាតិ  ​ ជា​ស្នូល​ដ៏​សំខាន់​នៅ​ក្នុង​មូលដ្ឋាន ដើម្បី​អោយ​មូលដ្ឋាន រឹងមាំ​រីក​ចម្រើន ។

សម្តេច​ចៅ​ហ្វា​វាំង​បាន​មាន​ប្រសាសន៍​បន្ត​ទៀត​ថា​៖ គណបក្ស​ប្រជាជន​គឺ​ជា​គណបក្ស​តែ​មួយ​គត់​ដែលបាន​រំដោះ​ប្រទេស​ជាតិ ប្រជាជន​អោយ​រួច​ផុត​ពី​របប​ប្រល័យ​ពូជ​សាសន៍  ប៉ុល ពត។ ក្រោមនយោបាយ​ឈ្នះ​ៗ​របស់​សម្ដេច​តេជោ​ហ៊ុន​សែន ប្រទេស​ជាតិ​មាន​ការ​បង្រួបបង្រួមជាតិខ្មែរតែមួយឡើងវិញ មាន​សុខ​សន្តិភាព​ពេញលេញ ប្រទេស​ជាតិ​មានការរីកចម្រើនជាលំដាប់។

សម្តេច​ចៅហ្វា​វាំង​ គង់ សំអុល ក៏​បាន​ផ្តាំផ្ញើ​ផង​ដែរ​ដល់​សមាជិក​បក្ស​ទាំងអស់ ត្រូវ​រឹត​ចំណង​សាមគ្គី​ផ្ទៃ​ក្នុងបក្ស​អោយ​បាន​រឹងមាំ  ត្រូវ​ចូលរួម​ផ្សព្វផ្សាយ​គោល​នយោបាយ​របស់​គណបក្ស អោយ​បាន​ទូលំទូលាយ​ដល់​ប្រជាពលរដ្ឋ​នៅ​ក្នុង​មូលដ្ឋាន  ដើម្បី​អោយ​ពួក​គាត់​បាន​យល់​ច្បាស់  និង​ចូលរួម​បោះឆ្នោត​គាំទ្រ​គណបក្ស​ប្រជាជន​កម្ពុជា នៅ​ឆ្នាំ​២០១៧ និង​២០១៨ ខាង​មុខ​នេះ​៕

2

3

3b

3c

4

7

5

5a

5b

6

9