កំពង់ចាម ៖ ថ្ងៃទី១ ខែកក្កដា ឆ្នាំ២០១៥ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីក្នុងទិវាមច្ឆជាតិ នៅអាងទឹកខ្នាច ភូមិវត្ត ឃុំទួលព្រះឃ្លាំង ស្រុកស្ទឹងត្រង់ ខេត្តកំពង់ចាម។
ដើម្បីថែរក្សាការពារធនធានមច្ឆជាតិឲ្យបានគង់វង្សសម្រាប់កូនចៅជំនាន់ក្រោយ សម្ដេចបានផ្ដល់អនុសាសន៍ចំនួន៧ចំណុច រួមមាន ៖
- សុំកុំប្រើឧបករណ៍ខុសច្បាប់ ពិសេសការប្រើឧបករណ៍ឆក់ត្រី
- កុំចាប់ត្រីក្នុងរដូវហាមឃាត់ គឺក្នុងរដូវត្រីពង
- សូមកុំកាប់ព្រៃលិចទឹកដែលជាជម្រកត្រីពងកូន
- ជួយផ្ដល់ព័ត៌មានអំពីជនខិលខូច និងមន្ត្រីខិលខូចដែលចូលទៅនេសាទ ឬពាក់ព័ន្ធនឹងតំបន់អភិរក្ស
- កុំយកបឹង ព្រែក ប្រើប្រាស់ខុសគោលដៅនេសាទ ដូចជា យកទៅដាំឈូក និងចាក់ដីលុប ជាដើម
- កុំឲ្យមានទំនាស់រវាងប្រជាពលរដ្ឋអ្នកនេសាទ និងអ្នកធ្វើស្រែប្រាំង ឬទំនាស់ដែនទឹកជាមួយប្រជាពលរដ្ឋ ដែលមកធ្វើនេសាទក្នុងតំបន់របស់ខ្លួន គឺត្រូវចែកគ្នារស់ទាំងអស់គ្នា និង
- សូមចូលរួមសកម្មក្នុងទិវាមច្ឆជាតិ ១ កក្កដា ជារៀងរាល់ឆ្នាំ ដែលជាទិវាជំរុញវារិវប្បកម្មឲ្យកាន់តែទូលំទូលាយ និងចូលរួមការពារត្រី និងជីវចម្រុះដែលជិតផុតពូជ។
